Rom 7 | NdeIBE | STEP | Kalazi yini bazalwane – ngoba ngikhuluma ebantwini abawaziyo umthetho – ukuthi umthetho ulamandla phezu komuntu nxa esaphila kuphela na?

Romans 7

Isibonelo Ngokuthathana

1 Kalazi yini bazalwane – ngoba ngikhuluma ebantwini abawaziyo umthetho – ukuthi umthetho ulamandla phezu komuntu nxa esaphila kuphela na? 2 Njengesibonelo, ngomthetho owesifazana owendileyo ubotshelwe kumkakhe nxa esaphila, kodwa umkakhe angafa, uyakhululwa emthethweni wokuthathana.

3 Kungakho-ke, angendela kwenye indoda umkakhe esaphila uthiwa yisifebe. Kodwa umkakhe angafa, uyakhululwa kulowomthetho angabi yisifebe, lanxa esesendela kwenye indoda.

4 Ngakho-ke, bazalwane bami, lani lafela emthethweni ngomzimba kaKhristu, ukuze libe ngabomunye, kuye owavuswa kwabafileyo, ukuze sithele izithelo kuNkulunkulu. 5 Ngoba sisabuswa yimvelo elesono izinkanuko zesono ezavuswa ngumthetho zazisebenza emizimbeni yethu, okwenza sathelela ukufa izithelo.

6 Kodwa khathesi, ngokufela kulokho okwake kwasibopha, sesikhululiwe emthethweni ukuze sikhonze ngendlela entsha yoMoya hatshi ngendlela endala yezimiso ezilotshiweyo.

Ukulwisana Lesono

7 Ngakho sizakuthini na? Umthetho uyisono na? Ngempela kawusiso! Ngeqiniso mina ngangingasoze ngazi ukuthi isono siyini ngaphandle kwangawo umthetho. Ngoba ngangingayikwazi ukuthi ukuhawukela ngempela kuyini aluba umthetho wawungatsho ukuthi, “Ungahawukeli.”

8 Kodwa isono, sithatha ithuba elilethwa ngumlayo, saveza kimi izinhlobo zonke zenkanuko yokuhawukela. Ngoba ngaphandle komthetho, isono sifile.

9 Mina ngake ngaphila ngaphandle komthetho; kodwa kwathi ekufikeni komlayo, isono savuka saphila, mina ngafa. 10 Ngathola ukuthi wona lowo umlayo owawuhlose ukuletha ukuphila kodwa waletha ukufa.

11 Ngoba isono, sithatha ithuba elalethwa ngumlayo, sangikhohlisa, kwathi ngomthetho sangibulala. 12 Ngakho-ke, umthetho ungcwele, lomlayo ungcwele, ulungile njalo muhle.

13 Kanti lokho okuhle kube yikufa kimi na? Akunjalo! Kodwa ukuze isono sibonakale siyisono, saletha ukufa kimi ngalokho okwakukuhle, ukuze kuthi ngomlayo isono sibe yisono esipheleleyo.

14 Siyakwazi ukuthi umthetho ungokomoya; kodwa mina kangisuwomoya, ngathengiswa esonweni njengesigqili.

15 Engikwenzayo angikuzwisisi. Ngoba lokho engifuna ukukwenza angikwenzi, kodwa lokho engikuzondayo ngiyakwenza. 16 Ngakho uma ngisenza lokho engingakufuniyo ukukwenza, ngiyavuma ukuthi umthetho ulungile.

17 Njengoba kunje, akuseyimi uqobo okwenzayo, kodwa isono esihlala kimi. 18 Ngiyakwazi ukuthi akulalutho oluhle oluhlala kimi, okutsho imvelo yami elesono. Ngoba ngilesifiso sokwenza okuhle, kodwa angingeke ngikufeze.

19 Ngoba engikwenzayo akusikho okuhle engifuna ukukwenza; hatshi, okubi engingafuniyo ukukwenza – lokhu ngiqhubeka ngikwenza. 20 Uma ngisenza engingafuniyo ukukwenza, akuseyimi okwenzayo, kodwa yisono esihlala kimi esikwenzayo.

21 Ngakho ngithola umthetho lo usebenza ukuthi: Lapho ngifuna ukwenza okuhle, okubi kulami khonapho. 22 Ngoba ebuntwini bami bangaphakathi ngiyathokoza ngomthetho kaNkulunkulu; 23 kodwa ngibona omunye umthetho usebenza ezithweni zami, usilwa lomthetho wengqondo yami ungenza ngibe yisibotshwa somthetho wesono osebenzayo ezithweni zami. 24 Yeka isinothongwana esengiyiso sona. Ngubani ozangihlenga kulo umzimba wokufa? 25 Kabongwe uNkulunkulu – ngoJesu Khristu iNkosi yethu! Ngakho-ke mina, engqondweni yami ngiyisigqili somthetho kaNkulunkulu, kodwa ngemvelo elesono ngiyisigqili somthetho wesono.